Google së shpejti do të ngjyrosë fotot bardhë e zi – Tani mund të kopjoni tekstin e një libri direkt nga kamera
Gjigandi i teknologjisë, Google, ka njoftuar disa prej ndryshimeve më të mëdha që do të vijnë në produktet e kompanisë. Në konferencën vjetore Google I/O, kompania prezantoi disa ndryshime që kanë të bëjnë me aplikacionet e fotografive.
Google Photos së shpejtë do të ofrojë një opsion për të ngjyrosur automatikisht fotografitë e vjetra bardhë e zi. Kjo gjë do të mundësohet falë inteligjencës artificiale që po zhvillon kompania dhe eliminon një proces të kushtueshëm për shumë persona që zgjedhin ndihmën e një profesionisti për të bërë këtë gjë.
Gjithashtu, aplikacioni do të përdorë inteligjencën artificiale për të ndihmuar në ndarjen e personave të ndryshëm në fotografi, si edhe do të njohë fotot e dokumenteve dhe do t’i konvertojë automatikisht në PDF.
Ndryshimet do të prekin edhe vetë aplikacionin e kamerës, në të cilin do të integrohet opsioni Google Lens. Thjesht duke hapur kamerën, aplikacioni do të mund t’ju tregojë se çfarë ndodhet në imazh. Mjeti i njohjes së imazhe do të dallojë informacione si librat, ndërtesat, veprat e artit, por edhe do të mund të ofrojë informacion se ku mund të blini rroba të ngjashme si në foto, apo sende të tjera që ju nevojiten.
Një tjetër opsion interesant që do të integrohet në kamera është edhe aftësia për të kopjuar tekstin direkt nga figura. Kjo veçori do t’ju ndihmojë edhe nëpër restorante të huaja për të mësuar më tepër rreth menusë.
Megjithatë, opsionet e lidhura me aplikacionin e kamerës do të vijnë vetëm për 10 pajisjes android: LGE, Motorola, Xiamo, Sony, Nokia, Transsion, TCL, OnePlus, BQ, Asus dhe Google Pixel.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.