Grantet e qeverisë zvicerane dhe PNUD për vetëpunësimin, mbi 1000 të rinj kanë aplikuar për të përfituar
Zyra Zvicerane e Bashkëpunimit për Zhvillim (SDC) ka financuar zbatimin e programit 4-vjeçar “Zhvillimi i Aftësive për Punësim”, i cili synon të ketë një kontribut në nivel sistemi për modernizimin e sistemit të AFP-së në Shqipëri duke adresuar disa sfida kryesore: mospërputhjen e kërkesës me ofertën për aftësi, aksesin në shërbimet e punësimit dhe formimit; tregun e punës në zonat rurale; menaxhimin efektiv të fondeve për punësim dhe trajnim; mungesën e koordinimit/ bashkëpunimit në sistem; informacionin e pamjaftueshëm të tregut të punës; dhe garantimin e cilësisë së ofertës dhe programeve të AFP-së.
“Gjatë dy fazave të para të programit, mbi 1000 të rinj kanë aplikuar, 230 janë trajnuar, dhe 36 biznese të reja janë regjistruar. Deri në fund të 2017, pritet regjistrimi i 100 bizneseve të reja”, thotë Nora Kushti, menaxhere e komunikimit në Zyrën e PNUD. “Programi i vetëpunësimit financuar nga qeveria zvicerane, mbështet të rinjtë që kanë dëshirën dhe vizionin për të ndërtuar biznesin e tyre. Nëpërmjet trajnimit mbi vetëpunësimin, këshillimeve të vazhdueshme gjatë gjithë fazave të programit, dhe mbështetjes financiare (në formën e pajisjeve dhe / ose materialeve), programi asiston në transformimin e ideve në biznese të qëndrueshme”, thotë koordinatorja e programit për vetëpunësimin në zyrën e PNUD, Jorina Kadare.
Një prej përfituesve të programit të vetëpunësimit është dhe Gerand Matraku, student i Fakultetit Ekonomik në Tiranë, në degën biznes, i cili pas prezantimit të platformës “Mr.Posted” fitoi grantin 500 mijë lekë.
Platforma e marketingut e krijuar nga studenti dallon nga idetë e tjera në treg që mund të ofrojnë të njëjtin shërbim, pasi ofron shfaqje të produkteve që marketohen, në 14 rrjete sociale, si Facebook, Twiter, Linkedln etj. Ai tregon se nuk shpenzon asgjë për mirëmbajtjen e platformës pasi kjo i mundësohet nga Amazone dhe Paypal përmes të cilit kryen transfertat me klientë që gjenden jashtë vendit.
Në Shqipëri, janë bizneset e vogla, ato që kryesisht kryejnë shitje online, të cilat kanë qenë më të interesuarat për këtë platformë novatore. “Para një muaji lancova fushatën time të marketingut ku e bëra të njohur Mr.Posted, dhe që ditën e dytë lidha kontratat e para. Sot numëroj 150 klientë prej të cilëve gjeneroj rreth 500 dollarë në muaj”, shprehet 19-vjeçari.
Në 1 janar do të nisë fushata e marketingut për këtë platformë, e cila do të fokusohet jo vetëm te Facebook e Google, por do të shfaqet dhe tek individët.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.