Grantet për bujqësinë – Veliaj, 13 administratorëve të periferisë: Nxisni fermerët të aplikojnë
Bashkia e Tiranës ka mobilizuar 13 administratorët e ish-komunave që të zhvillojnë takime informuese intensive me fermerët e zonave të tyre, që të mund të aplikojnë dhe përfitojnë nga Skemat e Subvencioneve në bujqësi.
Kryebashkiaku Erion Veliaj ka kërkuar që deri më 28 Mars, i cili është edhe afati i fundit i aplikimeve, të zhvillohet një garë mes administratorëve në këtë drejtim, dhe u ka bërë apel banorëve të këtyre zonave që ta trajtojnë bujqësinë si biznes dhe të mund të përfitojnë sa më shumë prej parave të vëna në dispozicion nga qeveria në formë grantesh.
Ndërkohë që një apel është bërë edhe për konsumatorët, që të zgjedhin prodhimin e vendit, duke bërë që paratë të qëndrojnë në Shqipëri.
Më datën 28 Shkurt janë hapur aplikimet për subvencionet në bujqësi dhe janë 20 milion euro të vendosura në dispozicion për fermerët.
Aplikimet bëhen pranë agropikave dhe në këtë fazë nuk nevojiten dokumentacione, pasi gjithçka bëhet me vetëdeklarim.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.