Grantet për universitetet – Artet, institucioni që buxhetohet më shumë nga MASR me 60%
Universiteti që buxhetohet më shumë nga Ministria e Arsimit Rinisë dhe Sporteve është ai i Arteve, ndërsa më pak ai i Tiranës.
Sipas të dhënave të publikuara në faqen zyrtare rezulton se Universiteti i Arteve ka një buxhet për vitin 2018 rreth 551 milion lekësh nga i cili rreth 50 deri në 60% e të ardhurave i siguron ministria përgjegjëse.
Nga 551 milion lekë buxhet për këtë vit, pjesa më e madhe, rreth 281,7 milion lekë shkon për pagat e punonjësve, 172 milion lekë për investime ndërsa pjesa tjetër ndahet në mallra dhe shërbime me 54 milion, sigurime shoqërore dhe shëndetësore me 40.8 milion 2.2 milion për transferta për individët dhe pjesa tjetër transferta korrente të huaja.
Në vitet e ardhshme parashikohet një ulje e buxhetit të këtij universiteti nga 551 milion që është aktualisht në 546 milion në 2019 dhe 417 milion për vitin 2020.
Më herët zëvendësministri i Arsimit Ervin Demo deklaroi për Scan se pavarësisht përqindjes më të lartë të grantit që i kalon këtij universiteti, krahasuar me të tjerët, nuk ndikon aspak në kontrollin akademik.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.