Granti për segmentin hekurudhor “Terminali i transportit publik Tiranë- stacioni i trenit Tiranë” shkon në Kuvend! Detajet e projektit
Në Kuvend është depozituar për ratifikim, ndryshimi i marrëveshjes së grantit të lidhur mes qeverisë shqiptare dhe BERZH. “Ndryshimi i marrëveshjes së grantit ka për qëllim financimin e projektit konceptual për rehabilitimin e linjës hekurudhore në seksionin
“Terminali i transportit publik Tiranë (PTT) deri te stacioni i trenit Tiranë”. Rehabilitimi I këtij seksioni është menduar të realizohet si shtesë e projektit për rehabilitimin e linjës hekurudhore Durrës – Tiranë (PTT) dhe ndërtimin e lidhjes së re hekurudhore me Aeroportin Ndërkombëtar të Tiranës. Ky rehabilitim dhe ndërtimi i linjës së re hekurudhore me Rinasin synon modernizimin e saj nëpërmjet përmirësimit të karakteristikave gjeometrike dhe operacionale të linjës hekurudhore në përputhje me standardet e BE-së, të përcaktuara nga direktivat përkatëse të Bashkimit Evropian, për të rritur efikasitetin dhe sigurinë e transportit hekurudhor të mallrave e të udhëtarëve ndërmjet Tiranës, Durrësit dhe aeroportit të Rinasit dhe, në të njëjtën kohë, për të kontribuar në mënyrë të konsiderueshme në zhvillimin ekonomik të zonës ekonomike të rajonit të Durrësit, Tiranës dhe të gjithë vendit” shkruhet në relacionin e nismës.
Objektivat e projektit:
Referuar relacionit, në bazë të vendimit të përbashkët të ish-Ministrisë së Transportit dhe Infrastrukturës dhe Bashkisë së Tiranës për rivendosjen e stacionit qendror të trenit dhe të lidhjes së tij hekurudhore me “Terminalin PTT” (afërsisht 4 km i gjatë), lind nevoja për një projekt konceptual për rehabilitimin e korridorit hekurudhor ekzistues, duke përfshirë linjën hekurudhore me të drejtën e kalimit në Bulevardin e Ri, si edhe zhvillimin e stacionit qendror të trenit në Tiranë.
“Që nga “Terminali PTT” dhe deri në ndërthurjen me Bulevardin e Ri të Tiranës, linja hekurudhore do të rehabilitohet në të njëjtat principe dhe parametra si ato të rehabilitimit të linjës Durrës – Tiranë (PTT). Nga ndërthurja me Bulevardin e Ri dhe deri te stacioni qendror i trenit Tiranë, linja hekurudhore duhet të integrohet me korridorin e Bulevardit të Ri të Tiranës, duke shqyrtuar projektin paraprak konceptual të alternativave të lidhura me konfigurimin e rrjetin rrugor e hekurudhor si edhe me atë të stacionit të trenit Tiranë” vijon relacioni.
Vlera e shtesës së grantit është në masën prej112 000 eurosh. Granti shtesë që do të akordohet nga BERZH-i, si menaxhues i fondeve të EWBJF, nëpërmjet ndryshimit të marrëveshjesnë fjalë, do të përdoret për financimin e projektit konceptual për seksionin hekurudhor “Terminali i transportit publik Tiranë (PTT) – stacioni i trenit Tiranë”, si shtesë e projektit të detajuar për rehabilitimin e hekurudhës Durrës – Tiranë (PTT), linja e re hekurudhore me Aeroportin e Rinasit dhe vlerësimi financiar/ekonomik i gjithë rrjetit hekurudhor shqiptar”, e financuar grant nga BERZH-i (EWBJF), në vlerën 1 103 000.00 euro.
Sipas marrëveshjes së grantit, datë 13 mars 2015, shuma disponibël për kryerjen e shërbimeve të konsulencës ishte deri në vlerën 1 103 000.00 euro, që është dhe vlera me të cilën u lidh kontrata përkatëse. Meqenëse vlera fillestare e grantit të akorduar nga EËBJF ishte 1 215 000.00 euro, diferenca e mbetur prej 112 000.00 eurosh do të mund të përdoret për financimin e projektit konceptual për seksionin hekurudhor “Terminali i transportit publik Tiranë (PTT) – stacioni i trenit Tiranë”. Projekti është pjesë e parashikimeve buxhetore të Ministrisë së Infrastrukturës dhe Energjisë, konkretisht në programin “Transporti hekurudhor” për parashikimin e vlerës së TVSH-së, 22 400.00 euro, me kontribut buxhetor.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.