Gratë kredimarrëse – Për herë të parë janë më shumë se burrat
Për herë të parë gjatë vitit 2016, numri i grave kredimarrëse në sistemin bankar ka kaluar atë të burrave.
Sipas të dhënave nga INSTAT dhe Banka e Shqipërisë, për vitin 2016, u regjistruan afro 241 mijë kredimarrëse gra, ose rreth 51% e numrit total. Numri i huamarrësve burra ishte rreth 233 mijë ose 49% e totalit.
Pavarësisht nga kjo, në numrin dhe vlerën totale të kredive të marra, burrat vazhdojnë të mbizotërojnë. Ndonëse një numër më i ulët kredimarrësish, burrat mbanin afro 62% të numrit total të kredive dhe afro 70% të vlerës totale të kredisë për vitin e kaluar.
Vlera mesatare e kredisë për një huamarrës burrë është afro 950 lekë, ndërsa për një huamarrëse grua pak më shumë se 400 mijë lekë.
Megjithatë, rritja e numrit të kredimarrëseve gra është një tregues i përmirësimit të statusit ekonomik të tyre në shoqërinë shqiptare. Sipas INSTAT, pesë vjet më parë, gratë zinin vetëm 37% të numrit total të huamarrësve në sistemin bankar.
Rritja e huamarrjes nga gratë është gjithashtu rezultat i zhvillimit të kulturës financiare dhe formalizimit të punës në ekonomi.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.