“Green Pass në bare, vështirë të aplikohet” – Shoqata, Jahaj: Nëse vendoset, të hiqet ora policore. Mos penalizoni më tej sektorin
Shoqata e Bar-Restoranteve është kundër vendosjes së “Green Pass” , si kusht për hyrjen në këto struktura biznesi, për sa kohë janë në fuqi edhe masa të tjera kufizuese sikurse është ora policore apo distanca midis tavolinave.
Kreu i kësaj shoqate, Enri Jahaj thotë për TV SCAN se vendosja e masave të reja mbi masat ekzistuese penalizon sektorin.
Jahaj e shikon të vështirë edhe zbatimin e kësaj mase, pasi sipas tij do të krijoheshin konflikte të panevojshme midis klientëve dhe stafit.
Gjithashtu, sipas kreut të shoqatës kamerierëve apo menaxherëve të këtyre strukturave i ngarkohen role kontrolluese, që nuk iu takojnë. Ndërkohë që, shtimi i stafit vetëm për këtë qëllim është i pamundur, për shkak të mungesës së punonjësve në tregun e punës.
Si grup interesi, Jahaj thotë se janë të gatshëm të bashkëpunojnë me institucionet shtetërore, përmes tryezave të përbashkëta.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.