Greenspan për kriptovalutat – “Nuk është e nevojshme që të prodhohen nga bankat qendrore”
Ish-kryetari i Rezervës Federale, Alan Greenspan, tha këtë javë se nuk ka nevojë që bankat qendrore të emetojnë valuta dixhitale. Ai theksoi se valutat kombëtare janë të mbështetura nga krediti sovran, diçka që asnjë organizatë tjetër nuk mund ta ofrojë.
“Krediti sovran i Shteteve të Bashkuara tejkalon imagjinatën e Facebook”, tha Greenspan, duke i’u referuar planeve të kompanisë për kriptovalutën Libra. Rrjeti social lajmëroi më herët gjatë vitit projektin e kriptovalutës Libra, që po zhvillohet në partneritet me kompani botërore të proçesimit të pagesave.
Megjithatë, muajin e kaluar, Visa, Mastercard, Paypal dhe eBay, u larguan nga projekti Libra, për shkak të rritjes së mbikqyrjes nga qeveria e Shteteve të Bashkuara. Nga ana tjetër, Banka Qendrore e Kinës po përpiqet të prezantojë kriptovalutën e vetë, por nuk ka dhënë ende detaje se kur do të dalë në treg.
Kriptovalutat kanë tërhequr vëmendjen botërore në vitin 2017 kur çmimi i bitcoin u fry nga qindra dollarë në $20,000. Shumë mbështetës të bitcoin thonë se meritat i ka teknologjia blockchain, që mbështetet nga një sistem i decentralizuar.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.