Grekët nuk përballojnë dot pushime – Shqipëria destinacioni kryesor, prej emigrantëve që vizitojnë familjet
Mund të duket pak e pabesueshme, po është fakt: shumica e atyre që kalojnë kufijtë e Greqisë në drejtim të një destinacioni janë kryesisht emigrantë në Greqi që vizitojnë vendet e tyre të origjinës, ose grekë të cilët kanë emigruar dhe largohen në drejtim të vendeve aktuale të banimit.
Sipas statistikave të fundit të disponuara, më shumë se 6 nga 10 grekë (63.6%) nuk udhëtuan askund, qoftë brenda apo jashtë vendit. Nga ata që udhëtuan, vetëm 5.4% dolën jashtë territorit të Greqisë dhe destinacionet kryesore të këtyre udhëtimeve ishin Shqipëria, Gjermania, Qipro dhe Mbretëria e Bashkuar.
Shumica e këtyre udhëtimeve nuk kishin qëllim argëtimin, por ishin vizita ndaj të afërmve që jetojnë në një vend tjetër.
Mesatarisht, rezidentët në Greqi që udhëtuan drejt Shqipërisë kaluan atje 12.6 netë dhe shpenzuan 19 euro në ditë.
Në Gjermani, si destinacioni i dytë kryesor, netët e qëndrimit ishin mesatarisht 12.3, ndërsa shpenzimi ditor ishte 47 euro. Në Qipro duket se grekët kaluan edhe më shumë net, mesatarisht 15.6 dhe shpenzuar rreth 33 euro në ditë.
Më dobët në udhëtime paraqiten vetëm banorët e Rumanisë dhe Bullgarisë, dy vendeve më të varfëra të Bashkimit Europian me përkatësisht 74% dhe 71% të popullsisë që nuk zgjodhi të udhëtojë.
Greqia ka parë një ulje të ndjeshme në këtë sektor që me shfaqjen e shenjave të para të krizës. Nëse në vitin 2008 udhëtuan jashtë vendit rreth 626 mijë njerëz, në vitin 2009 kjo shifër ra me 25% në 468 mijë njerëz. Në vitin 2015, numri i rezidentëve grekë që udhëtuan jashtë vendit ishte 439 mijë.
Nga statistikat e Bashkimit Europian, vetëm 3 nga 10 europianë udhëtuan jashtë vendeve të tyre. Ata që udhëtuan më shumë jashtë vendit ishin finlandezët (60.7%), danezët (58%) dhe austriakët (57.4%).
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.