Greqi, kreditë e këqija në 44.8% – Piraeus: 4 bankat kryesore do reduktojnë 50 mld euro deri në 2021
Greqia ka ndërmarrë disa hapa për të ulur nivelin e kredive të këqija, megjithatë, kreu i një prej bankave më të mëdha, thotë se kreditë jo performuese përbëjnë ende një çështje të madhe për ekonominë.
Bankat greke kanë nivelin më të lartë të kredive jo-performuese në Eurozonë, në 44.8%, sipas të dhënave të fundit të Parlamentit Europian.Christos Megalou, kreu i Piraeus Bank, tha se ka pasur progres të madh, por që duhet ende punë për të ulur sasinë e kredive të këqija në bilancet e bankave. Sipas tij, katër bankat sistematike kanë rënë dakord që të ulin kreditë jo-performuese deri në vitin 2021 me 50 miliardë euro, shifër që përbën 28% të Produktit të Brendshëm Bruto.
Për Piraeus, ekzekutivi tha se synimi është të reduktohen kreditë e këqija me 15 miliardë euro përpara vitit 2021, duke marrë parasysh fshirjen e 5 miliardë euro nga këto aktive në vitin 2018. Megalou mbështeti iniciativat nga Banka e Greqisë dhe Ministria e Financave për të ndihmuar bankat me këtë detyrë, duke thënë se sa më shumë mjete të ketë për këtë çështje, aq më mirë.
Greqia përfundoi periudhën 10-vjeçare të ndihmave financiare, pasi mbylli programin e tretë të shpëtimi në muajin Gusht. Vendi ka premtuar se do respektojë objektiva strikt fiskalë në vitet e ardhshëm, në këmbim të lehtësimit të borxhit. Sipas projeksioneve të fundit të Komisionit Europian, ekonomia greke pritet të rritet me 2.2% këtë vit dhe 2.3% në vitin e ardhshëm. Situata ekonomike në muajt e ardhshëm do të japë ndikim në reduktimin e kredive të këqija të bankave.
Kreu i Piraeus tha se ka pasur interes nga fondet ndërkombëtare për të blerë aktivet e këqija të Greqisë.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.