Greqia kalon reformat – Do të jetë më e vështirë të bëhen greva
Parlamenti helen miratoi edhe paketën e fundit të reformave, që pritet të zhbllokojë këstin e radhës së huasë prej 6.7 miliardë eurosh. Më 22 Janar Eurogrupi pritet që të miratojë rishikimin e tretë të programit të shpëtimit të vendit, çka do t`i hapë rrugë disbursimit të këstit të huasë. Reformat që sapo kaluan në parlamentin helen ishin kushti kryesor.
As kësaj radhe nuk munguan protestat jashtë parlamentit grek. Mediat helene bëjnë me dije se ishin mbledhur rreth 20 mijë protestues kundër masave të reja shtrënguese. Reformat e reja parashikojnë një proces të ri elektronik për borxhet e prapambetura dhe detyrimet ndaj shtetit, një ristrukturim të përfitimeve familjare, si dhe e bën më të vështirë thirrjen e një greve.
Përshkallëzimi i protestës bëri që policia të ndërhynte me gaz lotsjellës. Protestuesit lëshuan gurë dhe bomba artizanale ndaj forcave të ruajtjes së rendit. Kryeministri grek ndërkohë, Alexis Tsipras u shpreh se, reforma nuk përkthehet në heqjen e së drejtës për të protestuar dhe se kohët e vështira tashmë kanë kaluar. E drejta për të thirrur një grevë, më parë i takonte një të tretës së punonjësve, trashmë ky kuorum është ngjitur në të paktën 50%.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.