Greqia liston Shqipërinë si vend të sigurt – Publikon listën me 12 shtete, vetëm 3 europiane, kërkon reduktimin e azilantëve
Ministri i jashtëm grek, së bashku me atë për mbrojtjen e qytetarëve, kanë nënshkruar klasifikimin e 12 shteteve të ndryshme si vende të sigurta origjine. Një prej këtyre 12 shteteve është edhe Shqipëria.
Të tjerat janë: Gana, Senegali, Togo, Gambia, Maroku, Algjeria, Tunizia, Gjeorgjia, Ukraina, India dhe Armenia.
Pra, Shqipëria është një prej 3 vendeve europiane të përfshira në listë. Vendimi i përbashkët i dy ministrive greke ka për synim të ulë disi numrin e lartë të azilantëve, sidomos ata nga vende që nuk janë aspak në luftë, apo vende ku nuk u rrezikohet jeta siç është edhe Shqipëria.
Së fundmi, Greqia është kthyer në një prej destinacioneve kryesore të shqiptarëve që drejtohen rrugëve të Europës për azil.
Sipas të dhënave më të fundit të publikuara nga Eurostat, e që i referohen tremujorit të tretë të vitit, Greqia zë vendin e tretë, pas Francës dhe Mbretërisë së Bashkuar, me 14% të totalit të shqiptarëve që kanë bërë kërkesë për herë të parë për azil.
Bëhet fjalë për 720 aplikantë në tre muaj, çka duket se ka detyruar qeverinë greke ta klasifikojë Shqipërinë si një vend të sigurt origjine, që pritet të ulë ndjeshëm përgjigjet pozitive për azil, e për rrjedhojë edhe kërkesat.
Të njëjtin vendin ndërmori edhe Gjermania tre vite më parë, duke arritur edhe rezultatin e pritur.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.