Greqia mohon “sabotimin” – “Do ketë marrëveshje, paguajmë kreditorët në Korrik”
Qeveria greke në një dalje zyrtare, ka hedhur poshtë zërat e disa mediave gjermane, se vendi po planifikon të dështojë me qëllim pagesën e këstit të radhës që skadon në Korrik.
Sipas mediave gjermane, kjo gjë do të ndodhë në rast se, kreditorët do të dështojnë të dakordësohen për masat e lehtësimit të borxhit të vendit.
“Nuk është e vërtetë”, deklaroi zëdhënësi i qeverisë helene, i cili ndër të tjera shtoi se, do të ketë një marrëveshje në datën 15 Qershor.
Qeveria helene shpreson se në 15 qershor do të ketë një mbledhje të Eurogrupit për të arritur në një vendim për zhbllokimin e parave për Greqinë si dhe lehtësimin e borxhit të vendit, por deri tani as data nuk është vendosur ende.
Në muajin Korrik maturojnë 7.5 miliardë euro detyrime të qeverisë greke, dhe në rast se nuk do të marrë dot këstin e radhës nga kreditorët, të pezulluar prej 6 muajsh, Greqia nuk do të jetë në gjendje që ta kryejë këtë pagesë, ç`ka përkthehet në faliment.
Ministri grek i Financave ndërkohë, Euclid Tsakalotos, në një dalje për gazetarët, e përjashtoi tërësisht mundësinë e falimentit.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.