Greqia në blerjet e BQE, Tsipras: Përfshirja në program nuk është më e rëndësishme
Kryeministri grek Alexis Tsipras tha se stimujt e Bankës Qendrore Europiane nuk janë më thelbësorë për rimëkëmbjen ekonomike të vendit.
“Besoj se do t’i bashkohemi programit të lehtësimit të bankës por nuk është më aq e rëndësishme për ne, sa ç’mendonim më parë”, tha Alexis Tsipras.
Greqia nuk përshtatet për programin e stimujve të BQE për shkak se borxhi i vendit nuk ka një notë në gradë investimi nga agjencitë e vlerësimit të kreditit. Megjithatë, këto agjenci mund të ndryshojnë vlerësimin e Greqisë nëse vendi përfundon me sukses programin e tretë të shpëtimit.
Më herët, Kryeministri kishte thënë se blerjet e titujve të borxhit nga BQE do t’i jepnin besim investitorëve për vendin, duke mbështetur rimëkëmbjen ekonomike.
“Vlerësimi ynë më herët gjatë vitit qëndronte se programi i blerjes së Bankës Qendrore Europiane do të ishte thelbësor për të fituar aksesin në tregje, por nuk është e vërtetë”, tha Tsipras.
Greqia ka provuar tregjet financiar ndërkombëtar dy herë këtë vit dhe ka tërhequr interes të madh nga investitorët në të dy operacionet. Athina pritet të ndërmarrë 2 emetime të tjera në tregje përpara se programi i fundit i ndihmave financiare të mbarojë në muajin Gusht.
“Nuk kemi objektiv të fitojmë akses te programi i BQE përpara se të përfundojnë ndihmat”, shtoi Tsipras.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.