Greqia në rimëkëmbje – Ekonomia rritet për të 5-in tremujor radhazi, merr nxitje nga eksportet
Ekonomia e Greqisë është rritur për të 5-in tremujor radhazi dhe me një normë më të shpejtë krahasuar me fundin e vitit 2017, nxitur nga rritja e eksporteve. Sipas zyrës së Statistikave, ELSTAT, Produkti i Brendshëm Bruto u rrit me 0.8% në tremujorin e parë të vitit, krahasuar me 0.2% në periudhën Tetor-Dhjetor 2017.
Të dhënat tregojnë se rimëkëmbja e ekonomisë greke po rifiton vrull, pas një recesioni të gjatë, ku prodhimi kombëtar është tkurrur me 25%. Kjo ka rritur shpresat se Greqia do të dalë me sukses nga programet e shpëtimit, kur aktuali të përfundojë në muajin Gusht.
Me bazë vjetore, ekonomia e Greqisë u përshpejtua me 2.3% në tremujorin e parë, krahasuar me 2% në tremujorin e fundit 2017. Sipas analistëve, kjo ishte norma më e fortë vjetore e rritjes në një dekadë, me eksportet e mëdha që kanë dhënë kontributin më të madh, duke kompensuar efektin negativ nga shpenzimet për investim.
Sipas Elstat, eksportet janë rritur me 9.5% me bazë vjetore gjatë tremujorit, ndërsa importet kanë rënë me 2.7%. Me publikimin e të dhënave të fundit, analistët presin një rritje të ekonomisë për vitin e plotë në rreth 2%.
Projeksioni i fundit i Komisionit Europian e vlerëson rritjen ekonomike të Greqisë me 1.9% në vitin 2018, ndërsa Fondi Monetar Ndërkombëtar, në 2%.
Të dhënat e Elstat treguan gjithashtu se formimi bruto i kapitalit ra me 8.3% me bazë vjetore, ndërsa konsumi privat u rrit me 1.3%.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.