Greqia nis konsultimet për licencimin e resort kazinosë IRC – Pritet të krijojë mbi 75 mijë vende pune
Komisioni Grek i Lojërave (HGC), organi përgjegjës për dhënien e licencave të reja të operimit të kazinove, ka nisur konsultimet për miratimin e një leje për ndërtimin e një resorti kazino në Greqi, projektin më të madh të zhvillimit të Athinës.
I ashtuquajturi Hellinikon Integrated Resort Casino (IRC) do të ndërtohet mbi 600 mijë metra katrorë dhe do të përfshijë hotele, kazino, dyqane, hapësira zbavitëse, restorante si dhe atraksione të tjera turistike. Ky është një projekt shumë i rëndësishëm urban që pritet të krijojë rreth 10 mijë vende punë gjatë periudhës së ndërtimit dhe mbi 75 mijë vende më pas.
HGC ka ftuar palët e interesuara që të marrin pjesë në konsultim duke paraqitur propozimet dhe komentet e tyre mbi projektin deri në 10 shtator. Ndërkohë, sipas komisionit, IRC nuk ka të bëjë vetëm me licencimin e një objekti lojërash, por po ashtu reflekton angazhimin për të bashkëpunuar për zhvillimin dhe zbatimin e mëtejshëm të një destinacioni të qëndrueshëm turistik.
Sipas ‘Ekathimerini’, HGC parashikon një resort kazino të integruar, një projekt i destinuar për të transformuar Athinën dhe për të përmirësuar jetën e miliona banorëve dhe vizitorëve, si dhe për ta kthyer atë një motor rritës për ekonomikë greke.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.