Greqia pas programit të shpëtimit – Stournaras: Duhet një rrjet sigurie pas përfundimit të ndihmave
Guvernatori i bankës së Greqisë, Yannis Stournaras, tha se vendit i duhet një siguri financiare pas përfundimit të programit të shpëtimit në Gusht. Greqia ka marrë 260 miliardë euro në ndihmë financiare që prej vitit 2010 dhe programi i fundit skadon në muajin Gusht. Athina ka treguar se mund të fitojë vetë akses në para të re dhe këtë muaj gjeneroi 3 miliardë euro me emetimin e një obligacioni 7-vjeçar.
Megjithatë, disa politikëbërës europianë argumentojnë se vendi mund të mos ketë kapacitet për ta kaluar këtë periudhë pa një linjë të kreditit. Yannis Stournaras tha se duhet një program paraprak i suportit që do të ndihmojë procesin e financimit të Greqisë.
“Eksperienca ndërkombëtare ka treguar se testimi i tregjeve për të krijuar një rrjet sigurie të likuiditetit përpara përfundimit të programit, krijon një klimë të besueshme dhe hap rrugën e daljes së vendit nga ndihmat. Megjithatë, përveç kësaj, duhet konsideruar edhe një program paraprak i suportit”, tha guvernatori.
Qeveria i është shmangur një linje të tillë të kreditit për shkak se me shumë gjasa do të ketë edhe kushte të bashkangjitura, pas 8 vitesh të masave shtrënguese. “Mundësia e përdorimit të një programi parandalues të suportit nuk duhet bërë dramatike”, tha Stournaras.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.