Greqia tërheq rezervën për Vulën Apostile ndaj Shqipërisë – Në 2017-ën i ka kushtuar qytetarëve shqiptarë 6.7 mln euro
Greqia ka tërhequr rezervën për Vulën Apostile ndaj Shqipërisë, me efekt të menjëhershëm. Ministria për Evropën dhe Punët e Jashtme duke përshëndetur vendimin ka deklaruar se tërheqja e rezervës do të ketë impakt pozitiv te qytetarët shqiptarë që jetojnë në Greqi.
“Tërheqja e rezervës për Vulën Apostile, ka një impakt pozitiv praktik, kryesisht për qytetarët shqiptarë që jetojnë e punojnë në Greqi, duke lehtësuar dhe përshpejtuar procedurat e marrjes dhe përdorimit të dokumenteve të lëshuara nga institucionet shqiptare dhe greke, si dhe duke ulur ndjeshëm kostot e lëshimit të këtyre dokumenteve”.
Sipas Ministrisë për Evropën dhe Punët e Jashtme vetëm gjatë vitit 2017, kostot e përballuara nga qytetarët shqiptarë, për shkak të aplikimit të Vulës Apostile nga autoritetet greke, kanë kapur vlerën e 6.7 milionë euro-ve.
“Ky vendim i qeverisë greke përbën një angazhim të përmbushur në kuadër të dialogut dypalësh Shqipëri-Greqi, për çështjet e mbetura pezull prej një kohë të gjatë. Përveç impaktit real në jetën e përditshme të qytetarëve, tërheqja e rezervës për Vulën Apostile, tashmë nga të gjithë vendet anëtarët e BE-së, krijon mundësi të tjera për ofrimin e shërbimeve konsullore moderne për qytetarët tanë që jetojnë në Greqi”.
Vula Apostile është një lloj legalizimi që autoriteti kompetent i një shteti i bën dokumentit publik duke e kthyer dokumentin në të vlefshëm edhe për shtetet e tjera.
E.Z/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.