Greva e pilotëve të Ryanair – Prishen planet e 55,000 konsumatorëve në Europë
Kompania ajrore Ryanair është përballur me grevën më të keqe ndonjëherë, pas protestës së pilotëve në 5 shtete europiane, që ndërprenë planet e 55,000 udhëtuesve në kulmin e sezonit të pushimeve të verës.
Ryanair, që shmangu grevat gjatë Krishtlindjeve duke rënë dakord që të njohë sindikatat për të parën herë në historinë 30-vjeçare, nuk ka arritur të qetësojë protestat prej progresit të ngadaltë në marrëveshjet kolektive të punës.
Në kundërpërgjigje të njoftimeve për grevë nga sindikatat, Ryanair kishte lajmëruar anulimin e 250 fluturimeve në Gjermani, 104 në Belgjikë dhe 42 në Suedi dhe Irlandë, vendin e origjinës, ku thuajse 25% e pilotëve zhvilluan demonstratën e katërt 1-ditore. Linja ajrore priste që 42,000 udhëtues të pësonin ndërprerje vetëm prej grevave në Gjermani, ku shumica prej tyre ndërruan fluturim ose u rimbursuan.
Pasagjerët duket se mbronin anën e pilotëve, duke thënë se nuk kanë pse ta pësojnë ata, vetëm se njerëzit duan të fluturojnë me buxhet.
“Është e bezdisshme që po ndodh gjatë pushimeve të verës, por është e vetmja mënyrë”, tha Ingolf Shumacher, negociator i pagave në sindikatën gjermane të pilotëve, duke shtuar se pilotët duhet të përgatiten për një betejë të gjatë dhe se do të duhen muaj që të arrijnë ndryshime në linjën low-cost më të madhe në Europë.
Kjo betejë, përbën një nga sfidat më të mëdha për ekzekutivin Michael O’Leary, i cili ka thënë dikur se nuk do të njohë kurrë sindikatat. Anulimet prej grevës e kaluan shifrën prej 300 fluturime, që kompania u detyra të ndalojë në protestat e ngjashme në Belgjikë, Portugali dhe Spanjë.
Ryanair operon më shumë se 2,000 fluturime në ditë, i shërben 223 aeroporteve në 37 vende europiane dhe Afrikën e Veriut dhe këmbëngul se nuk do të ndryshojë modelin low-cost, që e ka kthyer në kompaninë më fitimprurëse në Europë.
Duke i kërkuar falje konsumatorëve, Ryanair deklaroi se ka marrë të gjitha masat për të limituar ndërprerjen dhe i bëri thirrje sindikatave që të vazhdojnë negociatat në vend që të ndërmarrin greva të pajustifikuara.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.