Guaido, president i përkohshëm – Merr mbështetjen nga jashtë. Kriza në Venezuelë drejt fundit
Lideri i opozitës në Venezuelë, Juan Guaido, u betua si president i përkohshëm i vendit të Amerikës së Jugut, ndërkohë që populli kërkoi fundin e qeverisë socialiste të Nicolas Maduro.
Guaido pati mbështetje diplomatike nga Shtetet e Bashkuara, Kanadaja dhe vendet e Amerikës Latine, pasi u vetë deklarua si president i përkohshëm, ndërkohë që njerëzit protestuan në rrugët e Caracas, me shpresat për ndryshim. Zv/presidenti i SHBA, Mike Pence, dha një mesazh të mbështetjes për Juan Guaido dhe e quajti Nicolas Maduro “një diktator që nuk ka pretendime të ligjshme për pushtet”.
“Amerikanët janë me ju. E mbështesim popullin e Venezuelës deri sa të rifitojnë lirinë dhe demokracinë. Maduro është një diktator që nuk ka pretendim të ligjshëm për pushtetin. Shpresojmë që Maduro të pranojë një tranzicion të qetë të pushtetit në Venezuelë” – tha Mike Pence.
Kryeministri Edi Rama shprehu gjithashtu mbështetjen për presidentin e përkohshëm dhe popullin e Venezuelës.
“Shqipëria e njeh Juan Guaido si president të përkohshëm të Venezuelës. I urojmë presidentit dhe popullit të Venezuelës që të çlirohen nga pushteti i jashtëligjshëm, që e ka kthyer vendin në një ferr për ata”- shkroi Kryeministri në Twitter.
Guaido ka premtuar zgjedhje të lira dhe të drejta, një qeveri tranzicioni që do t’i japë fund hiperinflacionit në vend dhe një amnesti për trupat ushtarake nëse ndihmojnë me heqjen e Maduros nga pushteti. Sipas analistëve, mbështetja e jashtme mund t’i ofrojë Guaido që të gjenerojë fonde nga jashtë për ushqime dhe barna për popullin që përballet me krizë ekonomike. Guaido premtoi se ndihmat humanitare do të shpërndahen me mbikëqyrjen e kongresit.
Ndërkohë, Nicolas Maduro, lajmëroi se vendi ka ndërprerë lidhjet diplomatike me Shtetet e Bashkuara dhe i ka dhënë diplomatëve amerikan 72 orë kohë që të largohen nga vendi.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.