Guida e Ekonomisë-Çfarë është tregu i kapitalit?
Në vend që të marrin para hua nga një bankë, qeveritë dhe kreditorë të tjerë si kompanitë apo agjencitë ndërkombëtare shpesh përdorin tregjet globale të kapitalit për të marrë para për operacionet apo veprimet e tyre.
Kjo bëhet zakonisht duke emetuar bono apo instrumente të tjera borxhi. Në shumë raste, kjo u lejon atyre që të mbledhin fonde kundrejt një kostoje më të ulët sesa po ta merrnin direkt nga banka.
Tregjet ndërkombëtare të kapitalit përdoren për të emetuar dhe për të tregtuar letrat me vlerë në botë.
Nuk ekziston një qendër për tregjet e kapitalit por një seri tregjesh të lidhura elektronikisht:banka dhe zona tregtie që ndodhen në qytete anë e mbanë botës që nga Tokio apo Singapori, në Londër e New York, për të përmendur disa prej tyre.
Tregtia ndërkombëtare e kapitalit shërben për një qëllim kryesor: ato transferojnë para nga ata që i kanë te ata që kanë nevojë dhe janë të gatshëm që të paguajnë një çmim për t’i marrë ato.
Qindra milionë për të mos thënë miliarda dollarë, marka, yen, paund, franga e euro tregtohen çdo ditë në tregjet e kapitalit të mbarë botës.
Kapitali apo pasuria e mbledhur, përbën bazën e të gjithë aktivitetit ekonomik në shoqëritë e orientuara nga tregu.
Në këtë kuptim, tregjet e kapitalt nuk duhet të ngatërrohen me makineri dhe ndërtesa, që gjithashtu emërtohen kapitale, të cilat kompania i përdor për të prodhuar të mira materiale dhe shërbime.
Instrumentet e borxhit të tregtuara në tregun global të kapitalit mund të blihen dhe shiten njësoj si çdo mall tjetër. Çmimi që huamarrësit paguajnë për borxhin përfaqësohet nga një letër, që është edhe certifikatë, është norma e interesit.
Ky çmim, ose norma e interesit, përcaktohet nga kërkesa dhe oferta. Kur ka mungesë parash për t’u dhënë si hua, huamarrësit duhet të paguajnë një normë interesi më të lartë. Kur ka shumë para, norma e interesit bie.
Tregejt ndërkombëtare të kapitalit bashkojnë një grup të madh huadhënësish dhe huamarrësish.
Kur një investitor zviceran blen bono nga Banka e Zhvillimit të Afrikës apo fondi i pensioneve japoneze, paratë transferohen nga njëra anë e botës në anën tjetër, ku mund të përdoren për zhvillim dhe rritje ekonomike.
Në ekonominë botërore të ndërlidhura, kursimet nuk është e nevojshme që të mbahen poshtë dyshekut, por mund të investohen përmes tregjeve të kapitalit që të përdoren në mënyrë produktive.
Përshtati në shqip: SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.