Gushti, “muaj i ftohtë” në shkëmbimet tregtare Shqipëri-Kosovë! Pas vrullit, ulet ritmi i eksporteve dhe importeve
Pas vrullit të muajve të mëparshëm ku u konstatua një rritje e shpejtë e shkëmbimeve tregtare mes Shqipërisë dhe Kosovës, ritmet në muajin gusht duket se kanë njohur një “frenim”. Referuar të dhënave të tregtisë së jashtme të publikuara nga INSTAT, rezulton se në muajin gusht të këtij viti, Shqipëria ka eksportuar më pak se në gushtin e vitit të kaluar.
Në gusht 2019, Shqipëria eksportoi në Kosovë 2.75 miliardë lekë mallra, në një kohë që në gushtin e vitit 2018, vlera e eksporteve ishte 2.8 miliardë lekë. Gjithsesi, niveli i eksporteve drejt Kosovës në rang 8 mujor (janar-gusht) rezulton se është me rritje të forta, krahasuar me të njëjtën periudhë të të vitit të kaluar (thuajse 4 miliardë lekë më shumë).
Në janar-gusht të 2019, Shqipëria eksportoi në Kosovë 20 miliardë lekë nga 16.8 që ishte në të njëjtën periudhë të një viti më parë.
Edhe me eksportet situata duket në “frenim”. Në gusht të këtij viti, Shqipëria importoi nga Kosova mallra në vlerë 702 milionë lekë, në një kohë kur në gushtin e 2018, importi ishte në vlerën e 808 milionë lekëve.
E njëjta tendencë konstatohet edhe në rang 8 mujor ku ka rënie krahasuar me vitin e kaluar. Në janar-gusht 2019 importet arritën vlerën e 5.6 miliardë lekëve, në një kohë kur vitin e kaluar, për të njëjtën, vlera e importeve ishte 6 miliardë lekë.
Megjithatë, për të gjykuar nëse gushti ishte përjashtim, apo fillimi i një kthese të eksporteve nga Shqipëria në Kosovë, do të na duhet të ndjekim hap pas hapi të dhënat e muajve të ardhshëm.
Edhe me rënien e eksporteve në Kosovë për muajin gusht , Kosova mbetet vendi me të cilin Shqipëria ka pasur ‘forcimin’ më të madh të eksporteve, duke u rritur me afro 20%, krahasuar me një vit më parë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.