Hahn, optimist për negociatat – Po punoj për një vendim pozitiv përpara verës
Komisioneri Europian për Zgjerim, Johannes Hahn, u shpreh optimist për mundësinë e hapjes së negociatave mes Brukselit dhe Shqipërisë e Maqedonisë së Veriut në kohën e paracaktuar, pra në Qershor.
Deklaratat e Hahn u bënë në një intervistë për Radion Evropa e Lirë. I pyetur për mundësinë e çeljes së negociatave në Tetor, ashtu siç po përflitet, Hahn shprehet:
“Ka disa diskutime por unë jam i përqendruar për të siguruar një vendim para verës, sepse ky ishte gjithmonë qëllimi ynë. Ne do të paraqesim raportin tonë vjetor për dy javë, ku me siguri do të japim një vendim pozitiv për të dyja vendet. Natyrisht ka gjithmonë disa punë që duhet të bëhen. Por, unë mendoj, sidomos kur është fjala për Maqedoninë e Veriut, se duhet të pranojmë përparimin e madh që ky vend ka bërë në tejkalimin e konflikteve dypalëshe, që është parakusht për anëtarësimin e ardhshëm në BE. Gjithashtu reforma e gjyqësorit në Shqipëri është diçka që duhet të shpërblehet. Pra, në këtë drejtim, mendoj se kjo vlerësohet në mënyrë pozitive nga shtetet tona anëtare.” – tha Johannes Hahn.
Ndër të tjera, Komisioneri Hahn ka komentuar edhe vendimin më të fundit të Parlamentit holandez sa i përket kërkesës për të pezulluar sistemin e liberalizimit të vizave me Shqipërinë, duke kërkuar më shumë përpjekje nga autoritet shqiptare në këtë drejtim.
“Ekzistojnë këto kontrolle të rregullta për numrin e atyre që ne i quajmë azilkërkues të pa financuar. Unë mendoj se këto shifra, në krahasim me numrin e përgjithshëm të njerëzve që udhëtojnë në këtë vend, janë shumë të vogla. Sidoqoftë, është diçka që kam diskutuar vazhdimisht me partnerët e mi në Shqipëri, por edhe në disa vende të tjera. Kjo duhet të trajtohet tërësisht nga autoritetet shqiptare, që do të thotë se ato duhet të komunikojnë. Ata duhet të informojnë popullin se të gjitha këto nisma janë pa ndonjë mundësi për t’u konfirmuar pozitivisht nga këto vende.” -tha Hahn.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.