Hahn për Aeroportin e Vlorës – “Deri tani nuk ka shkelje të MSA. Vlerësim i gjerë muajt në vijim”

Komisioneri për zgjerim, Johannes Hahn, i është përgjigjur zyrtarisht, në emër të Komisionit  Europian nëpërmjet një letre, euro parlamentarit Paul Rübig, i cili ka kërkuar hetim për qeverinë  shqiptare për shkeljen e Marrëveshjes së Stabilizim-Asociimit (MSA) me procedurën e prokurimit për aeroportin e Vlorës si dhe “Air Albania”.

“Komisioni është në dijeni të ankesave që lidhen me një shkelje të mundshme të Marrëveshjes së Stabilizim-Asociimit mes Shqipërisë dhe Bashkimit Europian, sa i përket ndërtimit të Aeroportit të Vlorës dhe krijimit të linjës ajrore “Air Albania”-shkruan Hahn në letër-përgjigjen e tij ndaj europarlamentarit. Sipas Marrëveshjes së Stablizim-asociimit kontratat publike nuk duhet të jenë objekt diskriminimi dhe kjo çështje ka qenë vazhdimisht temë bisedimi me autoritet shqiptare, thuhet më tej në letër.

“Ndërkohë që nuk është konstatuar asnjë shkelje e Marrëveshjes së Stabilizim-asociimit mes Shqipërisë dhe Bashkimit Europian në kontrollet e deritanishme, këto raste do të merren në konsideratë pa diskutim në vlerësimin e përgjithshëm të përmbushjes së direktivave europiane nga ana e Shqipërisë”-thuhet më tej.

“Një vlerësim më i gjerë dhe më i thellë i prokurimeve publike dhe kornizës së ndihmës shtetërore në Shqipëri dhe konkurrueshmërisë është planifikuar për në muajt në vijim, mbyllet letra e komisionerit Hahn për europarlamentarin e Partive Popullore Europiane. Marrëveshja e Stabilizim- Asociimit detyron qeverinë shqiptare që të hapë procedura publike të prokurimit me rregulla të barabarta për kompanitë europiane dhe ato jo-europiane.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.