Hajdutë të vërtetë u tregojnë sekretet e profesionit gjermanëve – Ja metodat për të përzgjedhur prenë
Një studim i Institutit të Kërkimeve Kriminologjike të landit të Nidersachsen në Gjermani, jep për herë të parë të dhëna mbi mënyrën se si funksionojnë në realitet hajdutët e banesave.
Kriminologët intervistuan 30 hajdutë serialë në burgje nga 15 shtete të ndryshme. Nga studimi rezultoi se qëllimi kryesor i hajdutëve janë paratë dhe stolitë, ndërsa disa të burgosurve zbuluan edhe metodat e tyre për identifikimin e banesave ideale për t’u vjedhur.
Një polak, i cili e konsideron veten “hajdut profesionist” thotë: “Unë shikoj për perde. Në atë mënyrë e di se atje jetojnë të moshuar. Dhe të moshuarit kanë shumë para”.
Një tjetër polak thotë: “Nëse garazhi është i hapur dhe sheh një Trabant (makinë e vjetër e prodhuar në Gjermaninë Lindore deri në vitin 1990), atëherë nuk ke nevojë të shkosh atje”.
“Kolegu” i tij nga Shqipëria thotë: “Kur errësohet pak, unë shkoj rreth ndonjë fshati. Cilado shtëpi që ka dritat ndezur, unë i bie ziles. Nëse atje nuk ka njeri, atëherë përpiqem të hap dritaren”.
Ndërkohë, një sllovak shprehet se sheh për lule: “Unë gjithmonë i zgjedh shtëpitë bazuar tek kopshtet. Nëse ke një kopësht të bukur me lule, atëherë unë e di që ke shumë para”.
Një tjetër sllovak: “Gjermanët zakonisht kanë dritare plastike. Pavarësisht çdo gjëje, për tre sekonda do e hapësh”.
Një i burgosur kroat: “Një dritare normale është si një derë e hapur. Por ka disa që janë më të plota. Ato nuk janë aq të lehta”.
As alarmet nuk i trembin hajdutët. Një holandez thotë: “Unë shkoj atje gjithsesi, marr çelësat e makinës, kërkoj për paratë, pastaj zhdukem. Zakonisht gjëra të tilla ndodhen në zonën e hyrjes së shtëpisë, çka i bën pre të lehta”.
Studimi u prezantua në një takim policie në Lingen. Hetuesit nga Niedersachsen, Nordrhein-Westfalen dhe Holanda, kanë vendosur të intensifikojnë punën e përbashkët në kapjen e hajdutëve.
Në rajonin e Niedersachsen vidhet çdo ditë të paktën 8 apartamente, 2937 vepra të ndodhura vitin e shkuar.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.