Hakerat sulmojnë Singaporin – Vidhen të dhënat shëndetësore të 1.5 mln banorëve dhe kryeministrit

Keqbërësit e rrjetit kanë thyer bazën e të dhënave shëndetësore të qeverisë së Singaporit, duke regjistruar kështu rrjedhjen më të madhe të të dhënave personale në vend.

Raportimet më të fundit flasin për të dhënat e 1.5 milionë qytetarëve, përfshirë ato të Kryeministrit të vendit, të vjedhura.

Këtë e ka pranuar tashmë edhe zyrtarisht qeveria e vendit, paçka se nuk jep asnjë detaj se kush mund të jetë prapa këtij sulmi të paprecedentë. Deklaratat për shtyp të ministrive përgjegjëse sinjalizojnë se, sulmi ka një nivel të lartë sofistikimi.

Hakerat kanë vjedhur kështu të dhënat shëndetësore të pacientëve që kanë vizituar klinikat e Singaporit mes datave 1 maj 2015 dhe 4 korrik të këtij viti. Ministri i shëndetësisë së vendit i ka kërkuar falje të gjithë pacientëve të prekur nga vjedhja e këtyre të dhënave.

Sulmi nga ana tjetër pritet të shkaktojë edhe probleme në funksionimin e sistemit shëndetësor, të paktën deri sa të sqarohet situata.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.