Hapa prapa me korrupsionin – Shqiptarët mendojnë se është përkeqësuar, e thotë “Transparency International”

Korrupsioni është një prej fenomeneve më të vështirë për tu matur. Gjerësisht, si matës i tij përdoret perceptimi i fenomenit, pra se si njerëzit e shohin përhapjen e tij në shoqëri të caktuara.

Më i besueshmi prej tyre, në rang ndërkombëtar, është pikërisht Indeksi i Perceptimit të Korrupsionit i Transparency International. Shqiptarët janë të 91-tët në botë në këtë renditje, ndër 180 ekonomi të marra në analizë.

Indeksi shënon gjithashtu një përkeqësim në krahasim me raportin e vitit të kaluar, si në renditje, ashtu edhe në pikëzim.

Një vit më parë, Shqipëria renditej e 83-ta në botë. Pikëzimi ndërkohë ka rënë nga 39 në 38 këtë vit. Kjo do të thotë se, të paktën për nga mënyra se si e perceptojnë shqiptarët, fenomeni i korrupsionit është rritur në krahasim me vitin e kaluar.

Shqipëria në këtë renditje lë pas Bosnje Hercegovinën dhe Maqedoninë, ndërkohë që Serbia, Mali i Zi dhe Kosova kanë një renditje më të mirë se Shqipëria.

Ndër vendet që ka bërë progresin më të ndjeshëm është edhe Kosova, që ka kaluar Shqipërinë në renditje, duke kapërcyer nga vend i 95-të në të 85-tin.

Vendi ynë është ndër më problematikët në Europë në drejtim të korrupsionit, gjë që duket qartë edhe nga harta.

Mesatarja globale fiksohet në 43 pikë, dhe Shqipëria me 38 pikë është larg kësaj. Mesatarja në 43 pikë flet për një korrupsion endemik në sektorin publik të një vendi.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.