Hapen dosjet që tregojnë bisedat e Thatcher ku ‘kritikon’ italianët, krahason integrimin evropian me komunizmin dhe përçmon Eurozonën
Margaret Thatcher shënoi planet e komisionit evropian për një monedhë të vetme si një “vrull gjaku që godet kokën”, sipas dokumenteve 30-vjeçare të lëshuara nga arkivat e qeverisë irlandeze.
Në një jehonë të debatit politik përçarës që përfundimisht çoi në Brexit, Kryeministrja e atëhershme Britanike fliste në “Byronë Politike” në Bruksel dhe u zotua të mos diktohej nga politikat e BE, gjatë bisedave me homologun e saj të atëhershëm Irlandez.
Udhëheqësja e Torit e krahasoi dhënien e kompetencave të taksimit te BE me heqjen e sovranitetit të vendeve që marrin pjesë në të, tregojnë arkivat nga 1990.
Shënimi i qeverisë irlandeze regjistroi se Thatcher duke folur për një monedhë të vetme, tha se [Zhak] Delors (kreu i atëhershëm i KE, duhet të ketë pasur një vërshim gjaku në kokë. “Ne nuk do të kemi një monedhë të vetme.”
Megjithëse Thatcher nënshkroi traktatin e Maastricht-it duke hapur rrugën për një integrim më të madh evropian, veçanërisht në tregti, ajo u bë gjithnjë e më e hapur për atë që e pa si tejkalim kompetencash nga Komisioni dhe nga ana tjetër frymëzoi rritjen e euroskepticizmit në radhët e partisë Tory.
Gazetat irlandeze tregojnë se ajo donte ta shndërronte Komisionin në një shërbim civil profesional, pa fuqinë e iniciativës, puna e të cilit do të ishte shërbimi i Këshillit të Ministrave që përfaqëson qeveritë kombëtare në Evropë.
Ajo i tha Haughey se ndryshimet kulturore midis vendeve anëtare lidhur me tregun e brendshëm të mallrave do të mbesin. “Italianët do të vazhdojnë të mos paguajnë taksa,” pohoi ajo në një moment.
Në atë kohë, kontrolli i Bashkimit Sovjetik mbi Evropën Lindore ishte duke u shembur dhe Thatcher e krahasoi Integrimin Evropian me komunizmin.
“Ne jemi duke u përpjekur që Evropa Lindore të pranojë standardet demokratike ndërsa për vete po rikrijojmë ‘Byronë Tonë Politike’. Është shumë e shëmtuar”.
Dokumentet e botuara rishtas janë të përfshira në numrin e referencës së dosjes së arkivave kombëtare irlandeze 2020/17/31.
D.B – SCAN
Burimi: The Guardian
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.