Hapen kriteret për programet e punësimit
Bizneset dhe punëkërkuesit mund të përfitojnë nga tre programet e nxitjes së punësimit të miratuara nga qeveria, ku përfshihet program i punësimit; formimit nëpërmjet punës dhe praktikave profesionale. Në programin e punësimit, bizneset aplikante përveç kritereve të përgjithshme që të jenë të rregullta me legjislacionin, nuk duhet të kenë shkurtuar staf në katër muajt e fundit.
Në këtë pikë, programi subvencionon kontributet e detyrueshme shoqërore dhe shëndetësore, të llogaritura në bazë të pagës minimale në shkallë vendi, të ofruara gjatë të gjithë kohëzgjatjes së punësimit, të kompensuara çdo muaj; financimin e pagës në shumën 100 të pagës minimale në shkallë vendi për katër muaj, për të gjithë pjesëmarrësit në program, të kompensuara në muajin e pestë dhe të gjashtë të kontratës, dhe në muajt e njëmbëdhjetë dhe të dymbëdhjetë të kontratës.
Përfitues janë punëkërkuesit afatgjatë, të pakualifikuar dhe nga grupe vulnerabël. Programi i formimit nëpërmjet punës ka si qëllim trajnimin në punë të punëkërkuesve, për një periudhë katër mujore. Edhe në këtë program, buxheti i shtetit paguan kontributet për kohëzgjatjen, pagën minimale, kontributet përgjatë gjithë pjesën tjetër të vitit nëse i trajnuari lidh një kontratë pune.
Ndërsa, programi i praktikave profesionale është ndihmesë ndaj punëkërkuesve të papunë, të cilët janë diplomuar në 24 muajt e fundit, dhe cilët janë regjistruar në zyrat e punësimit. Në këtë rast, paguhen kontributet për sigurimin nga aksidentet në punë, financim i pagës në shumën 50 % të pagës minimale në shkallë vendi, të kompensuara çdo muaj.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.