Hapet biblioteka “Musine Kokalari” – Veliaj: Investime të tilla transformuese, në çdo lagje të Tiranës
Biblioteka “Musine Kokalari” në Njësinë Nr. 7, nga një hapësirë e degraduar, që shërbente si magazinë librash, është shndërruar në hapësirë moderne leximi për të rinjtë.
Të apasionuarit pas librit kanë një ambient dinjitoz leximi, ndërsa banorët e zonës një hapësirë komunitare, ku mund të zhvillojnë aktivitete të ndryshme kulturore e sociale.
Kryebashkiaku Erion Veliaj theksoi se investime të tilla do të shpërndahen në çdo lagje.
“E fillojmë vitin 2018 me një bibliotekë moderne, e cila ka vendosur shembullin se çfarë quhet hapësirë publike cilësore në komunitet. Është shumë e rëndësishme që të kemi ndërtesa me hapësira ikonë për ngjarje kombëtare, por besoj se ajo që është më e rëndësishme është se nëpër lagje të kemi të njëjtën cilësi që kemi parë te sheshi “Skënderbej”, Pazari i Ri, Parku Olimpik apo Bulevardi i Ri”, u shpreh ai.
Sipas Veliajt, investimi në kulturë dhe dije është mënyra më e mirë për t’i orientuar të rinjtë te libri, duke i hequr nga bastet apo lundrimi në celular.
“Nëse më parë ishin bastet, bingot, llotot në ofensivë ndaj kulturës qytetare, ne e kemi kthyer këtë energji në më shumë terrene sportive, kënde lojërash dhe aktivitete. Pra, e kemi filluar ofensivën ndaj bingove e basteve, jemi në avantazh, por ende s’e kemi fituar betejën. Për këtë duhet që të kemi një vit të mbushur me investime të tilla”, shtoi kreu i Bashkisë së Tiranës. Ai tha se është shumë e rëndësishme që këto hapësira të mbushen me lexues dhe aktivitete të ndryshme, që të afrojnë sa më shumë qytetarë.
Për t’i kompletuar këto biblioteka, edhe me bazën e nevojshme për lexim, Veliaj tha se është e nevojshme bashkëpunimi dhe kontributi i të gjithëve, ashtu siç edhe vepruan këshilltarët e Këshillit Bashkiak të Tiranës të cilët dhuruan një fond modest librash.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.