Hapet në Valbonë “Zyra e Informacionit Turistik”! Në Tetor nisin punimet për Qendrën Profesionale të Zhvillimit të Turizmit

Fondi Shqiptar i Zhvillimit njofton se është hapur për herë të parë “Zyra e Informacionit Turistik” në Valbonë. Arsyeja e ndërtimit të kësaj zyre është ndihmesa e turistëve për të patur informacionin e domosdoshëm për këtë destinacion turistik ,aktivitetet, shërbimet dhe pikat më me interes për t’u vizituar.

Kjo zyrë informacioni është mundësuar në kuadër të projektit “Punët në Komunitet IV”, financuar nga qeveria shqiptare dhe Banka e Këshillit të Europës për Zhvillim.

Zyra do të jetë në dispozicionin e turistëve gjatë gjithë sezonit turistik, duke iu shërbyer turistëve të huaj dhe atyre vendas për dhënien e një informacioni profesional turistik.

Gjithashtu, ajo parashikohet se do iu vijë në ndihmë dhe bizneseve lokale që operojnë në zonë për promovimin e tyre, agjencive turistike për marketimin e produkteve, si edhe zonës në përgjithësi për promovimin e vlerave turistike, prodhimeve dhe kulinarisë lokale.

Alpet Shqiptare po kthehen në një nga destinacionet më të preferuara të turistëve. “Më shumë se 600,000 turistë llogaritet ta kenë vizituar këtë destinacion gjatë vitit të kaluar” shkruan FSHZH.

Ndërsa punimet për ndërtimin e Qendrës së Zhvillimit të Turizmit në Valbonë parashikohet të fillojnë në muajin Tetor 2018 dhe struktura do të jetë gati në fillim të sezonit të ardhshëm turistik.

m.l. /SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.