Hapet nyja e re e Milotit, Rama: Lehtësim i trafikut, së shpejti rrugët dytësore
Nyja e re e Milotit është hapur pak ditë më parë, duke lehtësuar ndjeshëm trafikun në sezonin veror, ku ka fluks të lartë lëvizjesh. Kryeministri Edi Rama ka publikuar në rrjete sociale një video të këtij aksi, ndërsa bën me dije se po vazhdon puna për rrugët dytësore.
“Me këto pamje (reale dhe jo 3D) të nyjës së re të Milotit, të hapur tashmë për qarkullimin e mjeteve duke lehtësuar ndjeshëm lëvizjen e dendur të këtij sezoni turistik, ndërsa vazhdon puna për rrugët dytësore deri në përmbylljen e plotë të kësaj vepre, ju uroj një ditë të mbarë ”, shkruan kryeministri Rama.
1.6 mld lekë do të jetë investimi i qeverisë shqiptare për përfundimin e punimeve në nyjen e Milotit, e cila është konsideruar një pikë strategjike për trafikun pasi lidh Rrugën e Kombit me aksin që shkon nga Tirana drejt Shkodrës.
Punimet janë inspektuar rreth një muaj më parë edhe nga Ministri i Infrastrukturës dhe Energjisë, Damian Gjiknuri si dhe kreu i Autoritetit Rrugor Shqiptar, Afrim Qendro.
Punimet pritet të përfundojnë tërësisht brenda 15 muajve, ndërsa përveç nyjes, ndërhyrja parashikon edhe rehabilitimin e 9 kilometra rrugë në gjithë zonën që është përreth saj.
MIRËMËNGJES 😃dhe me këto pamje të nyjes së re të Milotit (reale dhe jo 3D siç ishin pak muaj më parë😉), hapur tashmë për qarkullimin e mjeteve duke lehtësuar ndjeshëm lëvizjen e dendur të këtij sezoni turistik, ndërsa vazhdon puna për rrugët dytësore deri në përmbylljen e plotë të kësaj vepre të lënë me vite rrugëve si pjesë e harruar e Rrugës së Kombit, ju uroj një ditë të mbarë 👍
Posted by Edi Rama on Monday, August 13, 2018
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.