Hapet Qendra e Trajnimit të Noterëve / Gjonaj: Do të ketë fokus formimin fillestar të kandidatëve

“Për herë të parë në historinë e Noterisë Shqiptare është krijuar një Qendër Trajnimi tërësisht profesionale, e cila do të luajë një rol të rëndësishëm për të garantuar jo vetëm rekrutimin e kandidatëve të kualifikuar për këtë profesion, por edhe për të garantuar zhvillimin e mëtejshëm profesional të të gjithë lëmit të noterëve dhe zëvendës noterëve me qëllimin e vetëm, ofrimin e një shërbimi cilësor, transparent për qytetarët”. Ka qenë kjo deklarata e ministres së Drejtësisë Etilda Gjonaj në prezantimin e projektit.

Sipas ministres, me inaugurimin e saj si Qendra e parë dhe e vetme e trajnimit për noterët, përmes një strukturimi model, mundësohet zhvillimi i një programi të detajuar dhe me aktivitete të vazhdueshme e të përcaktuara qartë për të gjithë noterët, të cilët do të pasurojnë njohuritë e tyre në fushat kryesore të së drejtës si dhe do të fuqizojnë aftësitë praktike.

“Formimi fillestar i kandidatëve për noterë dhe ai i vazhdueshëm i noterëve-anëtarë të Dhomës Kombëtare të Noterisë, do të jetë objektivi i kësaj Qendre. Ndërkohë misioni ynë i madh është pastrimi i rradhëve të noterëve nga abuzuesit që dëmtojnë pafund emrin dhe reputacionin e të gjithë anëtarëve të ndershëm të komunitetit tuaj.

Të gjithë noterët kanë qenë pjesë e një procesi vlerësues dhe verifikimi, i cili vinte si një kërkesë e një standardi të ri të rregullave të ushtrimit të profesionit, ku padyshim pastërtia e figurës dhe profesionalizmi ishin standardet që synonim të arrinim përmes këtij procesi aspak të lehtë por me rëndësi themelore si në punën tuaj ashtu edhe në rolin rregullator të Ministrisë së Drejtësisë. Nuk harrojmë kërkesat e Këshillit të Europës përmes MoneyVal që e sheh pozicionin e noterit si kyç në luftën kundër pastrimit të parave” tha ministrja.

Tashmë me kriteret e reja për fitimin e  profesionit të noterit duke forcuar pozitën e tyre, duke stimuluar meritokracinë dhe rritur profesionalizmin, me një bazë elektronike të të dhënave të noterëve, dhe me çeljen dhe funksionimin e kësaj Qendre, sipas ministres, do të kemi noterë më profesionalë, do të kemi shërbime më cilësore, më transparente dhe më afër qytetarit.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.