Hapet tenderi/ Si do të jetë Godina e re e Fakultetit të Shëndetit Publik
Universiteti “Ismail Qemali” në Vlorë ka hapur tenderin për ndërtimin e godinës së Fakultetit të Shëndetit Publik.
Fondi limit është 367 milionë e 762 mijë lekë dhe afati për dorëzimin e ofertave është 01 shkurt 2021.
Zona për zhvillim ndodhet në territorin e Fakultetit të Shkencave Humane dhe godinave të konvikteve, të cilat kanë dalje në Rr.Sulejman Delvina dhe në afërsi të bulevardit ‘Sadik Zotaj’ në qytetin e Vlorës. Zona ndodhet në juglindje të qytetit të Vlorës dhe sheshi i përcaktuar për ndërtim është i orientuar JugLindje/Veri-Perëndim sipas brinjës më të madhe (sheshi ka një formë të rregullt drejtkëndore). Terreni paraqitet i sheshtë dhe aktualisht është i sistemuar pjesërisht si lulishte dhe pjesërisht si kënd sportiv për kompleksin e fakultetit.
Pjesa e tokës e parashikuar për zhvillimin e godinës universitare është ajo me sipërfaqe 1105 metër katror.
Në parcelë do të ndërtohet një objekt i vetëm me 5 kate dhe me një lartësi prej 19.75 m.
Në përcaktimin e njollës së ndërtimit për objektin e ri janë marrë parasysh:
-marrëdhënia me objektin ekzistues të universitetit – objekti i ri do të vendoset në mënyrë të tillë që të mos pengojë diellëzimin,hyrjen dhe sheshin e godinës ekzistuese.
-distancat minimale nga godinat rrethuese dhe kufiri i pronës në bazë të rregullores së ndërtimit – respektohen distancat minimale të ndërtimit nga objektet e konvikteve dhe pallati 2k që ndodhet në kufirin e pronës
-numrin e kateve dhe lartësinë e objektit të ri – sipas programit të funksioneve dhe sipërfaqeve që do të përfshihen në godinën e re përcaktohet që ajo do të jetë 5 kate me një lartësi prej 19.75 metra.
-orientimi dhe diellëzimi i objektit të ri – objekti do të ketë orientimin verilindje-jugperëndim i cili në këtë rast është mjaft i përshtatshëm për ventilimin tërthor dhe diellëzimin e ndërtesës si dhe paraqitet si orientim optimal i një godine për tipologjinë së cilës i përket objekti.
Objekti i ri është pjesë e një kompleksi godinash ekzistuese deri në 4 kate të larta dhe të ndërtuara para viteve 1990. Format që ndeshim përreth janë të pastra, minimaliste dhe aspak ekspresive. Në këtë kontekst është zhvilluar edhe objekti i ri, me konceptet e një arkitekture bashkëkohore por në harmoni me kompleksin ekzistues.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.