Hapi i radhës i FED – Të dhënat mbi ekonominë sjellin dyshime për takimin e Qershorit
Analistët kanë nisur të dyshojnë mbi rritjen e normës bazë të interesit nga Rezerva Federale në takimin e radhës, në një kohë të rritjes së ngadaltë të inflacionit dhe shenjave të dobësimit të ekonomisë. Takimi i muajit të kaluar tregoi se politikëbërësit po planifikojnë të tkurrin politikat monetare përsëri në datën 14 Qershor. Sipas Bloomberg, tregjet analizojnë se shanset për rritjen e normës së interesit me 25 pikë bazë në takimin e Qershorit qëndrojnë në 90%.
Megjithatë, të dhënat mbi ekonominë në SHBA kanë rezultuar poshtë projeksioneve në muajin e fundit. Inflacioni qëndron i ulët, të dhënat mbi punësimin te publikuara javën e kaluar rezultuan poshtë projeksioneve dhe disa politikëbërës po analizojnë nëse është momenti i duhur për të vazhduar me ciklin tkurrës monetar. Banka e investimeve Goldman Sachs shtyu projeksionet për rritjen e tretë të normës së interesit këtë vit në Dhjetor, nga muaji Shtator që e priste më parë.
Departamenti i Punës raportoi se norma e papunësisë ra në nivelin më të ulët në 16 vite, në 4.3% për muajin Maj. Megjithatë, hapi i rritjes është ngadalësuar ndjeshëm, pasi punësimi u rrit me vetëm 138 mijë vende, apo 66 mijë më pak se në muajin Prill. Të ardhurat mesatare për orë u rritën me 2.5% për muajin Maj me bazë vjetore, duke treguar se fuqizimi i tregut të punës nuk ka nxitur rritjen e pagave.
Komisioni Federal i Tregut të Hapur (FOMC), rriti për herë të fundit normën e interesit në muajin Mars dhe projektoi atëherë se do të ketë 2 ndërhyrje të tjera për këtë vit. Projeksionet e bankës do të përditësohen përsëri në takimin e Qershorit.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.