Hapja e negociatave me BE – Balla: Jemi optimistë, opozita të lobojë nga Berlini pro anëtarësimit

Qeveria shqiptare shprehet besimplotë për marrjen e rekomandimit pozitiv nga Komisioni Europian për çeljen e negociatave të Shqipërisë me BE. Kryetari i grupit parlamentar të Partisë Socialiste, Taulant Balla në një prononcim për mediat u shpreh se edhe opozita duhet të ketë rolin e saj pozitivë për hapjen e negociatave. Balla i bëri apel kreut të opozitës që të lobojë nga Berlini pro hapjes së negociatave.

“Shpresoj që Basha të mos investohet me nje lobim kundër hapjes së negociatave, edhe me prezencën e fundit në Berlin. Si çdo shqiptar që e do vendin e vetë, Basha duhet të lobojë pro hapjes së negociatave, pasi nuk është fitore e PS, por një kulmim i një procesi historik ku kanë kontribuar të gjitha qeveritë. Prej nesër fillon një proces i ri për lobingun pozitiv që Shqipëria duhet të bëjë në vendet anëtare, pasi kalon në vendet anëtare dhe janë ata që vendosin”, tha Balla.

Këtë deklaratë kreu i grupit parlamentar të PS e bëri në prag të publikimit më 17 prill të raportit të përparimit për gjashtë shtetet e Ballkanit Perëndimor. Sipas parashikimeve pritet që Shqipëria dhe Maqedonia do të marrin rekomandime për hapjen e negociatave të anëtarësimit me BE.

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.