Hapja e negociatave, Vlahutin: Muajt në vijim do të jenë kyç

Muajt në vijim do të jenë kyç për çeljen e negociatave, kështu deklaroi ambasadorja e BE-së Romana Vlahutin në aktivitetin e shkollës verore europiane, i financuar nga Bashkimi Europian. Më tej ambasadorja është shprehur se janë në pritje të kuvendit të ri dhe nisjes nga puna të qeverisë.

“Për çeljen e negociatave muajt në vijim do të jenë shumë të rëndësishëm kyç. Është e qartë për të gjithë çfarë lipset që të ndodhë sa i takon 5 prioriteteve kyçe, por në veçanti lidhur me të gjithë aspektet e ligjit dhe në veçanti me luftën kundër krimit të organizuar, përfshirë asgjësimin e kultivimin dhe tregtisë së kanabisit. BE po pret mbledhjen e Kuvendit të ri të Shqipërisë dhe nisjen nga puna të qeverisë së re.”

Shkolla verore europiane po zhvillohet për të dytin vit radhazi në vendin tonë dhe do të vijë deri më 8 shtator.

Shkolla Verore Evropiane synon të identifikojë dhe të angazhojë një grup të konsoliduar ekspertësh me njohuri të thella mbi procesin e integrimit evropian, të cilët mund të kontribuojnë në procesin e negociatave të anëtarësimit të Shqipërisë në BE.

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.