Hapja e sektorit financiar të Kinës – Pritet t’i japë një mundësi të artë firmave të huaja
Sektori financiar prej 42 trilionë dollarësh i Kinës pritet të bëhet më i hapur përballë botës.
Për të mbajtur premtimet dhe larguar kërcënimet e tarifave nga Donald Trump, zyrtarët kinezë kanë caktuar datën 30 Qershor afat, për të lehtësuar kufizimet e pronësisë për bankat, firmat e letrave me vlerë, manaxhuesit e portofolit dhe firmat e sigurimit të jetës.
Firmat e letrave me vlerë si Goldman Sachs dhe UBS, kanë një mundësi për të shtuar me pesëfish pjesëmarrjen e tyre, ndërkohë që marrin kontroll direkt të sipërmarrjeve të përbashkëta.
Hapja e sektorit financiar do të transformojë mënyrën se si shpërndahet kapitali dhe manaxhohet pasuria në të gjithë Kinën. Sipas Bloomberg, të ardhurat e bankave të huaja pritet të rriten 10 herë më shumë deri në vitin 2030.
Megjithatë, do të qëndrojnë lojtarë të vegjël, krahasuar me kompanitë vendase. Ndikimi i përgjithshëm do të vijë ndërkohë që prezenca e tyre përmirëson standardet e huadhënies dhe ushtron presion në një sistem që i jep avantazh sipërmarrjeve të zotëruara nga shteti, nëpërmjet të cilave bankat kanalizojnë kreditë me idenë se Pekini do të ndërhyjë nëse dështojnë pagesat.
HSBC, Standard Chartered dhe Citigroup janë aktualisht bankat më të mëdha të huaja në Kinë.
Sipas Bloomberg, fitimet e firmave të letrave me vlerë pritet të rriten katërfish, ndërkohë që shtohet prezenca e tyre.
UBS ka nënshkruar një aplikim për të blerë pjesën më të madhe të aksioneve në sipërmarrjen që ka në Kinë, duke u bërë banka e parë globale që përfiton nga premtimet e Pekinit.
Kina deklaroi se do të rrisë limitin e zotërimit të huaj në fondet e përbashkëta dhe firmat e letrave me vlerë në 51% në Qershor të këtij viti dhe se do të heqë çdo limit pas 3 vitesh.
Duke parë hapësirën e investimit që do të krijohet, sipas Bloomberg, nëse firmat e huaja mund të përfitojnë vetëm 6% shtesë të pjesës deri në vitin 2030, ata do të merrnin 1.8 trilionë dollarë aktive nën manaxhim.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.