Haradinaj: Seanca për qeverinë ndoshta nesër, s’i kam ende emrat e ministrave

I mandatuari për formimin e qeverisë, Ramush Haradinaj ka thënë se Marrëveshja për Demarkacionin me Malin e Zi ka gabime dhe se qëllimi i tij është ta përmirësojë këtë marrëveshje.

“Kufiri i Kosovës është Çakorr dhe Kullë. Dallimi do të jetë se nuk do t’i humbim kohë vendit. E mendoj shpejt zgjidhjen e kësaj teme dhe nuk do të jetë pengë kjo temë”, ka thënë Haradinaj në një konference për media.

Më tej ai ka bërë me dije se janë duke u bërë përgatitjet e nevojshme për seancën ku do të votohet qeveria, raporton “Indeksonline”.

“Seanca mund të jetë nesër pasdite. Besoj se jemi në rregull. Por, partitë ende nuk m’i kanë sjellë emrat e ministrave”, ka shtuar Haradinaj.

Duke folur për ikjen e qytetarëve nga vendi, Haradinaj është zotuar se qytetarët e vendit do ta kenë zgjidhjen këtu.

“Do të jem i hapur. Do t’i pres për të krijuar zgjidhje në vend. Ju bëj thirrje të rinjve ta kthejnë shpresën në këtë vend dhe këtu më së shumti ka vlerë vetja jonë”, ka theksuar Haradinaj.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.