Haradinaj takon Merkel – Diskutohet marrëdhënia me Serbinë dhe heqja e vizave
Kryeministri i Kosovës, Ramush Haradinaj, ka takuar kancelaren gjermane Angela Merkel, gjatë vizitës së tij në Berlin. Ndër temat kryesore përfshiheshin forcimi i marrëdhënieve mes Kosovës dhe Gjermanisë. Në lidhje me marrëveshjes mes Kosovës dhe Serbisë, Kryeministri tha se kjo duhet të përfshijë vetëm kufijtë ekzistues.
“Sa i përket dialogut me Serbinë, theksova se ne mbështesim një marrëveshje gjithëpërfshirëse, ligjërisht të detyrueshme, përfshirë njohjen reciproke në kufijtë ekzistues”, deklaroi Haradinaj. Gjatë takimit me kancelaren, Haradinaj ka biseduar edhe mbi çështjen e liberalizimit të vizave, duke thënë se qytetarët e Kosovës, ndonëse i përkasin popullit më pro-Europës, janë mbajtur të izoluar.
“Në këtë rast, e falenderova kancelaren Merkel për këmbënguljen e shtetit gjerman, për sa i përket mbrojtjes së sovranitetit dhe integritetit territorial të Kosovës, si dhe për vendimin e Gjermanisë për t’i thënë “PO” heqjes së vizave për qytetarët e Kosovës”, shkroi Haradinaj në Facebook pas takimit.
Klevis Llaha /SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.