Hedhja e mbetjeve në kontenierët përkatës në Tiranë – DPN1: Mungon sensibilizimi
Mungon sensibilizimi në radhët e qytetarëve në kryeqytet sa i takon hedhjes së mbeturinave në vendet e duhura.
Ndonëse, Drejtoria e Përgjithshme Nr.1 e Punëtorëve të Qytetit, Bashkia Tiranë ka marrë masa për të informuar banorët, përmes rrjeteve sociale, mediave apo drejtpërdrejt përmes fushatave sensibilizuese, sërish situata mbetet e njëjtë.
Qytetarët të painformuar vazhdojnë të gabojnë në këtë drejtim edhe pse kushtet nuk mungojnë dhe të gjitha rrugët janë pajisur me kontenierët përkatës.
Njësia e Monitorimit, institucion në varësi të Drejtorisë së Përgjithshme Nr.1 të Punëtorëve të Qytetit kryen çdo ditë monitorime në terren, ku ka evidentuar raste të ndryshme rreth kësaj problematike.
Ka raste ku mbetjet e ndryshme hidhen jashtë koshave; në disa raste të tjera mbetje të sasive të mëdha hidhen në koshat e vegjël, të cilët janë të papërshtatshëm për këto lloje mbetjesh.
‘’Urbanizimi, procesi i rritjes së popullatës urbane, i progresit dhe zhvillimit të qyteteve, padyshim që ka pasur edhe ndikimet e veta negative. Një prej tyre është ndotja e ambientit si pasojë e shtimit të mbetjeve urbane. Për të minimizuar këtë problematikë përveç kontenierëve që janë të pranishëm kudo në Tiranë Drejtoria e Përgjithshme Nr.1 e Punëtorëve të Qytetit, Bashkia Tiranë ka shtuar numrin e koshave të vegjël, të cilët janë në administrim të saj. Duam të theksojmë se këta kosha shërbejnë për mbetje të rastësishme, kryesisht ambalazhime por qytetar të papërgjegjshëm, hedhin në to mbetje të çfardollojshme shtëpiake dhe industriale, madje edhe mbetje të përmasave disa herë më të mëdha se vet përmasa e koshave,’’ thonë specialistë të DPN1.
Sipas specialistëve janë të paktë qytetarët që respektojnë ndarjen e mbetjeve sipas përcaktimeve të koshave, ndërkohë që shumica ose neglizhojnë ose nuk kanë informacionin e duhur.
“Rëndom në rrugët e qytetit shikon këtë pamje, pavarësisht punës së palodhur të punëtorëve të DPN1, të cilët i pastrojnë këta kosha 2 herë në ditë, dhe masave të ndërmarra nga kjo drejtori për të ndërgjegjësuar qytetarët për të bërë dallimin e koshave nga kontejnerët dhe për të diferencuar mbetjet që duhet të hidhen ne kosha nga ato që duhet të hidhen ne kontenier. Kjo situatë nuk mund të zgjidhet vetëm me punën e drejtorisë sonë, por edhe me kontributin e qytetarëve në këtë drejtim. Sigurisht që duhet të jemi të gjithë bashkë për një qytet më të pastër, për një të ardhme më të mirë. Qytetarët duhet të kuptojnë se Tirana është shtëpia jonë e përbashkët dhe duhet të kujdesemi për pastërtinë e saj ashtu siç kujdesemi për shtëpitë tona,’’ theksojnë më tej specialistët e DPN 1.
Nga të dhënat e fundit të marra në Drejtorinë e Gjelbërimit pranë DPN1, muajt e fundit Tiranës i janë shtuar 150 kosha të rinj krahas 496 koshave dekorativë dhe riciklues të instaluar më herët. Konkretisht këto kosha janë vendosur përgjatë brezit të gjelbër të Lanës, në bulevard, lulishte, blloqe banimi, shkolla, çerdhe e institucione të tjera.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.