Hekurudha e re Tiranë-Durrës me zgjatim në Rinas-Ministria e Infrastrukturës njofton hapjen e tenderit

Ministria e Infrastrukturës njofton se është hapur tenderi për ndërtimin e hekurudhës Tiranë-Durrës, me zgjatim Qafë Kashar-Rinas. Projekti parashikon që trenat në këtë linjë të lëvizin me një shpejtësi mesatare 100 kilometra në orë.

“I hapet drita jeshile ndërtimit të hekurudhës Tiranë-Durrës, me zgjatim Qafë e Kasharit-Rinas. Pas miratimit të Bankës Europiane për Rindërtim dhe Zhvillim, tashmë është hapur tenderi për realizmin e këtij projekti.

Projekti parashikon që trenat në këtë linjë të lëvizin me një shpejtë mesatarisht 100 km/orë ndërsa kjo vepër do të jetë në funksion të qytetarëve dy vite nga nisja e punimeve” njofton Ministria e Infrastrukturës.

Vlera totale e projektit është 8.75 miliardë lekë, që tashmë janë siguruar nga financimi i huaj.

Ndërkohë që linja e re që synohet të shtohet, fillon në kilometrin e 27-të nga Durrësi dhe përfundon me një terminal pasagjerësh në Aeroportin “Nënë Tereza”.

Çmimi i biletës pritet të kushtojë nga 1-1.2 euro, ndërsa punimet pritet të mbyllen në fund të vitit 2020. Linjat e reja pritet të rrisin efikasitetin dhe sigurinë e transportit hekurudhor të mallrave e të udhëtarëve ndërmjet Tiranës, Durrësit dhe aeroportit të Rinasit dhe në të njëjtën kohë, do të kontribuojë në zhvillimin ekonomik të zonës ekonomike të rajonit të Durrësit, Tiranës dhe të gjithë vendit.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.