Hëna e krimbit do të shkëlqejë këtë javë – Është hëna e plotë e fundit e dimrit 2022!

Hëna e plotë e marsit do të arrijë kulmin e saj të premten (18 mars), vetëm dy ditë para ardhjes së pranverës në hemisferën veriore.

Prandaj, nuk është çudi që shumë nga emrat tradicionalë të lidhur me hënën e marsit kanë të bëjnë me pranverën dhe stuhitë famëkeqe të marsit. Më i famshmi është Hëna e krimbave, por Almanac.com liston një bollëk emërtimesh të tjera të mundshme në Shtetet e Bashkuara, mes tyre Stuhia ose Hëna e Urisë.

Hëna do të arrijë kulmin e saj në orën 3:18 të mëngjesit EDT (0718 GMT), por nëse nuk jeni në gjendje të dilni kaq herët në mëngjes, ajo do të vazhdojë të duket përafërsisht e plotë nga mbrëmja deri në mëngjesin e së shtunës, shkroi NASA në udhëzuesin e vet. Me ekuinoksin pranveror që vjen të dielën (20 mars), kjo është hëna e fundit e plotë e dimrit të këtij viti.

Hënat e plota janë objektiva të lehta për t’u vëzhguar, edhe me sy të lirë. Nëse ndodh që të keni dylbi ose një teleskop, mund të jeni në gjendje të kapni disa kratere në sipërfaqe, megjithëse objekte të tilla dallohen më lehtë kur një pjesë e hënës është në hije.

Nëse ndodh që të dilni herët në mëngjes, ka të ngjarë të shihni një bollëk planetësh që shoqërojnë hënën. Afërdita, Marsi dhe Saturni janë të gjithë të dukshëm në qiell që në mëngjes, megjithëse dy planetët e parë do të jenë shumë më të lehtë për t’u dalluar pasi janë më të shndritshëm dhe më lart në qiell, sipas Sky&Telescope.

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.