Hendeku gjinor në paga – Gjermania dështon ta mbyllë. Gratë paguhen 21% më pak

Gjermania ka dështuar të mbyllë hendekun gjinor në paga, vitin e kaluar. Kjo ndasi vjen prej arsyeve strukturore, si kujdesja për familjen dhe punësimi me paga më të ulëta. Zyra Federale e Statistikave zbuloi se burrat fitonin 21.6 euro për orë, ndërsa gratë paguheshin 21% më pak në mesatare, apo vetëm 17.09 euro për orë. Fuqia punëtore gjermane përfshinte 10.6 milionë punonjës me kohë të pjesshme në vitin 2017, ku prej totalit, vetëm 9% ishin burra.

Gratë punonin kryesisht në sektorë me paga të ulëta, duke mos arritur postet ekzekutive. Në sondazhe, gratë janë përgjigjur se kujdesi për fëmijët ka qenë një nga arsyet për punët me kohë të pjesshme, ndërsa për burrat, zgjedhja është bërë për të ndjekur trajnime apo shtuar kualifikimet. Duke parë vende ekuivalente të punës, gratë fitonin 6% më pak se burrat,  duke përdorur formulën e hendekun gjinor të përshtatur.

Hendeku gjinor në moshën e daljes në pension ka rezultuar më i lartë, për shkak se të ardhurat më të ulëta gjatë karrierës kanë sjellë kontribute më të ulëta. Gjatë “Ditës së Barazisë në Paga”,  autoriteti i transportit të Berlinit,  ka ulur çmimin e biletave të trenave me 21%  në 5.5 dollarë, për të simbolizuar hendekun. Dita e barazisë në paga shënon ditën e 77 të kalendarit,  që është koha deri në të cilën gratë punojnë pa pagesë, nëse krahasohen me pagën e burrave.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.