Heqja e kufizimeve rrit 18% tregun e sigurimeve AMF: Numri i kontratave u shtua me 22%, arkëtimet nga primet rreth 140 milionë dollarë
Heqja e kufizimeve të lëvizjes për njerëzit e mallrat për këtë vit janë reflektuar menjëherë në treguesit e sektorit të sigurimeve. Sipas të dhënave zyrtare të Autoritetit të Mbikëqyrjes Financiare, arkëtimet e këtij tregu arritën në rreth 140 milionë dollarë për nëntë mujorin e këtij viti, me një rritje prej mbi 18% krahasuar me të njëjtën hapësirë kohore të një viti më parë.
Të ardhurat nga primet e shkruara bruto të sigurimit për periudhën janar-shtator 2021 kapën vlerën 14,166 milionë lekë, raporton AMF, ose 18.06% më shumë se në janar-shtator 2020. Gjatë periudhës janar-shtator 2021, numri i kontratave të sigurimit të lidhura arriti në 849,732 me një rritje prej 22.53% krahasuar me të njëjtën periudhë të një viti më parë.
Ndërkaq, tregu mbetet i orientuar tek sigurimet e Jo-Jetës, të cilat sollën 92.6% të vëllimit të përgjithshëm të primeve, ndërsa sigurimet e Jetës kanë 7.23%. Parë nga këndvështrimi i ndarjes së tregut sipas llojit të sigurimit, i detyrueshëm dhe vullnetar, primet e shkruara bruto të sigurimit vullnetar zënë 39.35% dhe primet e shkruara bruto të sigurimit të detyrueshëm zënë 60.65% të totalit të tregut.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.