Hidhnin mbetjet në det dhe nxirrnin inerte nga lumenjtë, Policia arreston abuzuesit në Lezhë dhe Kurbin
Policia vijon operacionin për parandalimin, evidentimin dhe goditjen e krimeve mjedisore. Tek këto krime përfshihet marrja e inerteve pa leje në shtratin e lumenjve, ndërtimet pa leje, prerja e paligjshme e pyjeve, ndotja e ambientit e lumenjve apo zjarr-vënia e qëllimshme pyjeve dhe kullotave.
Policia e Shtetit në njoftimin e saj bëri me dije se gjatë kontrollit me IKMT-në përgjatë lumit Mat ka kapur në flagrancë duke nxjerrë inerte shtetasin, D.B., 56 vjeç me banim në Kurbin, i cili është gjobitur me 2 milion lekë (të reja).
Ndërkohë në Lezhë gjatë kontrollit të një fabrike përpunimi peshku është vërejtur se shkarkonte mbetjet në rrjetin e kanalizimeve të ujësjellësit në Shëngjin. Në këtë rast është proceduar shtetasi G.A, 37 vjeç dhe gjobitu në vlerën 500 mijë lekë (të reja).
Njoftimi i plotë:
Vijon operacioni për parandalimin, evidentimin dhe goditjen e krimeve mjedisore
• Procedohet penalisht një tjetër shtetas, për përpunim të inerteve dhe gjobitet nga IKMT-ja me masë administrative;
• Procedohet penalisht një 37-vjeçar dhe gjobitet, pasi shkarkonte mbetje në rrjetin e kanalizimeve të ujësjellësit;
• Një ditë më parë u proceduan dhe u gjobitën edhe dy shtetas të tjerë, për gërryerje të shtratit të lumit Mat.
Në vijim të punës për parandalimin, evidentimin dhe goditjen e krimeve mjedisore, shërbimet e Komisariatit të Policisë Lezhë, në bashkëpunim me IKMT-në, kanë vijuar kontrollin përgjatë shtratit të lumit Mat, ku gjatë kontrollit është kapur në flagrancë duke nxjerrë materiale inerte dhe është proceduar shtetasi D.B., 56 vjeç, banues në Kurbin.
IKMT e ka gjobitur shtetasin me masë administrative 2 milion lekë (të reja).
Gjithashtu, specialistët për Hetimin dhe Parandalimin e Krimit në Komisariatin e Policisë Lezhë proceduan penalisht shtetasin G.A., 37 vjeç, banues në Ishull Lezhë. Shërbimet e Policisë dhe IKMT-së, gjatë kontrollit konstatuan se fabrika e përpunimit të peshkut, shkarkonte mbetjet në rrjetin e kanalizimeve të ujësjellësit në Shëngjin.
IKMT-ja e ka gjobitur subjektin me masë administrative 500 mijë lekë (të reja) si dhe do të ndërpresë lidhjen me rrjetin e kanalizimeve.
Kontrollet do të vijojnë për penalizmin e çdo subjekti që tenton të marrë inerte pa leje në shtratin e lumenjve apo që kryejnë krime mjedisore, si ndërtime pa leje, prerje të paligjshme të pyjeve, ndotje të ambientit e lumenjve apo zjarrvënie të qëllimshme pyjeve dhe kullotave.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.