Hidrokarburet – Gjiknuri: Mirëpresim investimet amerikane edhe në këtë fushë
Ministri i Infrastrukturës dhe Energjisë Damian Gjiknuri, në përfundim të vizitës së tij në Shtetet e Bashkuara të Amerikës zhvilloi një vizitë me Zëvendëssekretarin e Departamentit të Energjisë, Dan Brouillette.
Pasi vlerësuan nivelin e lartë të bashkëpunimit mes dy vendeve, Gjiknuri u ndal te përpjekjet e qeverisë shqiptare në reformim e sektorit të energjisë, liberalizmin e tregut si dhe ndërlidhjen me vendet fqinje. Më tej, ata u ndalën gjithashtu edhe te sektori hidrokarbur, fusha e kërkimit, shfrytëzimi i naftës si dhe ecuria e projektit të Korridorit Jugor të Gazit (gazsjellësi TAP).
Ndërkohë, ministri njohu sekretarin amerikan për hapat në kuadër të hartimit të Masterplanit të gazit dhe mbi perspektivën për gazifikimin e vendit.
Duke argumentuar se Shqipëria ofron potenciale në fushën e hidrokarbureve, Gjiknuri tha se vendi ynë mirëpret investime amerikane edhe në këtë fushë.
Ndërsa Zv.Sekretari Brouillette shprehu gatishmërinë për të dhënë ekspertizë për ato çështje për të cilat qeveria shqiptare e shikon të nevojshme në sektorin e energjisë elektrike dhe fushën e hidrokarbureve.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.