“High-Tech” kundër Trump – Google krijon një fond për çështjen e emigrantëve
Ekzekutivët e gjigantit të teknologjisë, Google, kanë krijuar një fond për periudhë krize prej 2 milionë dollarë që mund të bashkohet me 2 milionë dollarë donacione nga punonjësit.
Ky total prej 4 milionë dollarë do të shkojë për katër organizata: American Civil Liberties Union, Immigrant Legal Resource Center, International Rescue Committee dhe UNHCR. Kjo është fushata më e madhe e ndërmarrë ndonjëherë nga Google për periudhë krize.
Individualisht, ekzekutivë të kompanive po kontribuojnë gjithashtu për çështjen. Fushata është shpalosur në një shkresë të kreut ekzekutiv të Google Sundar Pichai dhe është konfirmuar nga një zëdhënës i kompanisë.
Granti vjen një ditë pasi kreu i Google dha kundërshtime të forta ndaj direktivës së Donald Trump për ndalimin e emigrantëve. Ekzekutivë të Apple, Microsoft, Netflix, Airbnb dhe Tesla kanë kritikuar politikën, që është ndaluar përkohësisht nga një gykatës federal në New York.
Urdhri mund të ndërprejë në mënyrë të ashpër operacionet e kompanive të teknologjisë, që mbështeten shumë te punonjësit e jashtëm. Në një shkresë për stafin, kreu i Google tha se ky vendim ndikon të paktën 187 persona brenda kompanisë.
“Jemi të shqetësuar për ndikimin e këtij urdhëri dhe çdo propozimi që mund të shkaktojë kufizime për punonjësit e Google dhe familjet e tyre, apo që mund të sjellë barriera në talentet e rinj që vijnë në SHBA”, deklaroi Google.
Kompani të tjera kanë reaguar gjithashtu. Airbnb lajmëroi se do të gjejë vende të lira dhe të përkohëshme për refugjatët dhe udhëtues të tjerë të ndikuar nga urdhëri i Trump.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.