Hipertensioni, një vrasës i heshtur – Rreth 17.9 milionë njerëz në botë vdiqën në vitin 2019 nga sëmundjet kardiovaskulare
Rreth 1.3 miliardë njerëz në botë vuajnë nga hipertensioni, një vrasës i heshtur shpesh i shkaktuar nga obeziteti që rrit rrezikun e sëmundjeve të zemrës, goditjes në tru dhe sëmundjeve të veshkave, deklaroi Organizata Botërore e Shëndetësisë.
Hipertensioni mund të diagnostikohet lehtësisht duke monitoruar presionin e gjakut dhe të trajtohet me barna me kosto të ulët, por gjysma e njerëzve të prekur nuk janë në dijeni të gjendjes së tyre e cila nuk trajtohet, nënvizon OBSH dhe Kolegji Mbretëror i Londrës (Imperial College London) në një studim të përbashkët të botuar në The Lancet.
Ndërsa normat e hipertensionit kanë ndryshuar pak në 30 vjet, ngarkesa e rasteve është zhvendosur në vendet me të ardhura më të ulëta, pasi kombet e pasura e kanë vënë atë nën kontroll, thekson studimi.
Rreth 17.9 milionë njerëz vdiqën në vitin 2019 nga sëmundjet kardiovaskulare, duke përbërë një në tre vdekje globale, me hipertensionin që ishte faktori kryesor.
Bente Mikkelsen, drejtor i departamentit të OBSH -së për sëmundjet jo të transmetueshme tha se përveç faktorëve të rrezikut gjenetik për hipertension, ekzistojnë “faktorë rreziku të modifikueshëm” të lidhur me stilin e jetës.
Këto përfshijnë dietat jo të shëndetshme, pasivitetin fizik, konsumimin e duhanit dhe alkoolit, diabetin e pakontrolluar dhe mbipeshën. Referuar obezitetit, ajo tha se “ky është vërtet cunami i faktorëve të rrezikut”.
Klevis Llaha/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.