Hiqet renta për metalet e përpunuar – Projektligji: Lehtësim për industrinë për shkak të COVID-19, 500 mln lekë më pak në buxhet

Mineralet metalore që përpunohen në vend dhe eksportohen në formën e nënprodukteve minerare, sikurse është ferrokromi apo koncentratet e kromit dhe të bakrit do të përjashtohen nga taksa e rentës minerare për një periudhë 3-vjeçare”. Propozimi është bërë nga qeverisa dhe tashmë ka shkuar në Kuvend për diskutim, ndërkohë që relacioni shoqërues shpjegon se ai ka për qëllim të mbështesë industrinë e përpunimit të mineraleve metalore, e cila po përjeton një periudhë krize të thellë si pasojë e efekteve të pandemisë COVID-19, që kanë shkaktuar dhe ulje të kërkesës dhe çmimeve të tregut ndërkombëtar të nënprodukteve minerare metalore.

Ndryshimi i propozuar synon gjithashtu që të incentivojë përpunimin në vend, rritjen e investimeve, punësimin si dhe një shfrytëzim më të balancuar dhe të qëndrueshëm të mineraleve. Në grupin e mineraleve metalore që preken nga ky projektligj përfshihen kromi dhe bakri. Ky është grupi më i rëndësishëm  i mineraleve, që përfaqëson rreth 85% të investimeve që realizohen çdo vit në industrinë minerale. Brenda këtij grupi, minerali i kromit ka peshën më të madhe me rreth 80% të investimeve. Miratimi i këtij projektligji parashikohet që për periudhën 3-vjeçare të sjellë një efekt negativ prej afërsisht 500 milionë lekë në buxhetin e shtetit.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.